असार २२, कावासोती
कावासोती नगरपालिकाले भेरोसेल खोप असार २६ गते लगाउने भएको छ । गत जेठ २८ गतेदेखी ३० गतेसम्म पहिलो खोप लगाएकाहरुलाई दोस्रो खोप लगाउन लागिएको हो । खोप लगाउनका लागि प्रथम चरणमा भेरोसेल खोप लगाएको खोप कार्ड ल्याउनुपर्ने छ ।
कावासोती नगरपालिका अन्र्तगत पहिलो खोप लगाएका स्थानहरुमा दोस्रो खोप लगाईने कावासोती नगरपालिका स्वास्थ्य शाखाका पारेश्वर भुत्र्येलले जानकारी दिनुभयो ।
कावासोती नगरपालिका अन्र्तगत रहेका शिवमन्दिर स्वास्थ्य चौकी, कावासोती स्वास्थ्य चौकी, पिठौली स्वास्थ्य चौकी , कुमारवर्ती स्वास्थ्य चौकी र अग्यौली स्वास्थ्य चौकीमा खोप लगाईने भएको हो । स्वास्थ्य शाखाका अनुसार असार २६ गते विहान १० बजे देखी दिउसो ४ बजे सम्म खोप लगाईने जनाएको छ ।
कोभिड १९ विरुद्धको भेरोसेलको दोस्रो डोजको खोप जिल्लाभर ४ हजार ९६५ जनालाई लगाइने लक्ष्य राखिएको स्वास्थ्य कार्यालय नवलपुरका प्रमुख केशव चापागाईले जानकारी दिनुभयो ।
जिल्लाका आठ स्थानीय तहमध्ये यसअघिको पहिलो चरणमा गैँडाकोटलाई ९६० डोज, देवचुलीलाई ७८२, कावासोतीलाई १०२५, मध्यविन्दुलाई ८७०, हुप्सेकोटलाई ४०४, विनयी त्रिवेणीमा ४०४, बौदिकालीमा २१० र बुलिङ्टारमा ३१० खोप डोज उपलब्ध गराइएको थियो । दोस्रो चरणमा पनि यही अनुपातमा उपलब्ध गराइने जनाइएको छ ।
