कावासोती, जेष्ठ १९
नवलपुरको दुम्कौलीमा रहेको चौधरी ग्रुप अन्तर्गतको सीजी ब्रुअरीमा लागेको आगो १० घण्टापछि नियन्त्रणमा आएको छ ।
देवचुली नगरपालिका–२ दुम्कौलीमा रहेको चौधरी ग्रुपको औधोगिक ग्राममा रहेको सीजी ब्रुअरीमा बिहान सवा ८ बजेबाट सुरु भएको आगलागी साँझ साढे ६ बजे नियन्त्रणमा आएको हो । ब्रुअरीमा लागेको आगो निभाउन ८ वटा दमकललाई १० घण्टा भन्दा बढी समय लागेको हो ।
कारखानामा लागेको आगो नियन्त्रणका लागि पूर्वी, पश्चिम नवलपवरासी र चितवनका ८ वटा दमकल प्रयोग गरेर सेना, सशस्त्र प्रहरी, प्रहरी र उद्योगका कर्मचारी खटिएका थिए ।
जिल्ला प्रहरीका प्रवक्ता दिलिप गिरीले बियर कारखानाको आगो नियन्त्रणमा लिन सुरक्षाकर्मीलाई १० घण्टाभन्दा बढी समय लागेको जानकारी दिए । आगलागीबाट मानवीय क्षति भने नभएको उनले बताए ।
बिहान ८ बजे बियर उत्पादन गर्ने कारखानाबाट धुवाँको मुस्लो निस्केपछि बाहिरका मजदुरले आगो लागेको जानकारी दिएको प्रशासन प्रमुख दामोदर पौडेलले जानकारी दिएका छन् । प्रहरीका अनुसार गोदाममा तयारी अवस्थामा राखिएको बियर जलेर नष्ट भएको छ । तयारी बियर, कार्टुन, बियर बनाउने कच्चापदार्थ ,कारखानको इन्जिनियरिङ विभाग, गोदाम, कार्टुन गोदाम र कार्यालय जलेर नष्ट भएको छ ।
चौधरी ग्रुपका महाप्रबन्धक मधुु पौडेलले भने आगलागीबाट भएको क्षतिको विवरण आउन अझै केही समय लाग्ने बताएका छन् ।
